انواع الشعر الشعبي...موسوعه كامله - اخبار العراق
 

اخبار العراق

 


  اخبار العراق > الاقسام الادبية > Love, Poetry, romantic, scattering > منتدى الشعر الشعبي

منتدى الشعر الشعبي منتدى الشعر العراقي الشعبي

انواع الشعر الشعبي...موسوعه كامله

انواع الشعر الشعبي...موسوعه كامله أخواني و أحبابي ولو راح أطوّل عليكم أحببت أن أعرّفكم بأصناف الشعر الشعبي العراقي و أطرح بعض الأبيات التي أعتبرُها و يعتبرُها العراقيون من الأبيات

إضافة رد
 
LinkBack أدوات الموضوع إبحث في الموضوع انواع عرض الموضوع
قديم 08-10-2011   رقم المشاركة : 1







عبيديه وافتخر غير متواجد حالياً

عبيديه وافتخر على طريق التمييز


حصري انواع الشعر الشعبي...موسوعه كامله


انواع الشعر الشعبي...موسوعه كامله

أخواني و أحبابي ولو راح أطوّل عليكم

أحببت أن أعرّفكم بأصناف الشعر الشعبي العراقي و أطرح بعض الأبيات التي أعتبرُها و يعتبرُها العراقيون من الأبيات الرائعة كونها تـُحاكي المجتمع العراقي و كأننا نقرأ حالة إجتماعية موجزة في بيتين من الشعر كتبَها أحد الشعراء و قد يَجد له ردّاً من شاعر آخر..

أولاً / الشعر الشعبي العمودي :

و هو مَبني على صَدر و عَجز و قافية واحدة أو أكثر و تـُستعمَل فيه كل اللهجات العراقية المُختلفة مثل اللهجة البغدادية أو المُوصِلـّية أو لهجة أهل الجزيرة أو لهجة أهل الرمادي أو لهجة أهل الجنوب ... حسب إنتماء الشاعر الجغرافي . و هو من أكثر أنواع الشعر الشعبي شيوعاً و إنتشاراً و يُعالج المواضيع المُختلفة. و هُـنالك آلاف القصائد من هذا النوع و هذه قصيدة للمُبدع مالك الحزين يُصَوّر فيها موقف لمّا أراد أن يُصارح حبيبته بحُبّـه ( لهجة سكـّان الجزيرة - وسط و شمال غرب العراق) :

إنتَ عينك على شِفـتي ..... و آنة عيني على الشِفايف
و آنة كِل عظامي تِرجف ..... إنتَ خايف و آنة خايف
شلون هَسّة ؟ مِنهو يحچي ؟ ..... مِنهو يبدي بالسوالف
إنتَ لو آني دِخيلك ..... مو هِمِت و گلبيي تالف
أدري بعيونك تحِبني ..... و گلبي لِعيونك مُوالِـف
بَس تعال للـّي يحچي كِلمة ..... بلا خجَل و بلا مَخاوف
ما خِجَلت بيوم مَـرّة ..... و بالحَچي شايف و عايف
و ياما ياما لساني غازل ..... و سَكـّتِت ياما مضايف
و هَسّة أريد أحچيلي كِلمة ..... مِرتِبك جسمي يتراجَف
و إنتَ شو هَم مِثلي تِرجف ..... و بالعَرَگ شو هَم مِثلي طايف
إشصار بينة ؟ إشمَر علينة ؟ ..... شكِثـر مَرّينة بمواقِف
ما خِجَلنة و ما رجَفنة ..... و ما نِبوگ العين طارف
چَنهة مو كِلمة أحبّـك ..... چَن جبَل بگلـَيبي واگف
و أريد أگِلـّك شِنهي هِـيّـة ..... كِلمة لو جُـرُم و مخالِف
شو أحبّـك حيل أحبّـك ..... كافي عَرگانين و ندَوّر مَناشِف


ثانياً / الشعر البدوي :

و ينتشر هذا النوع من الشعر في المناطق الغربية من العراق و لا يقـتصر نظمه على أهل البادية بل يتعدّاه إلى العديد من الشعراء في المناطق الحضرية . بحُكم أن نِسبة لا بأس بها من سُكـّان العراق كانوا من سُكـّان البادية و لِحَـدّ الآن .

و لشاعر كلمات كتبها بلهجة بادية العراق الجنوبية الغربية (أقرب للسعودية) :

گالت أحبك شوف هذه دَمعتي
گلت الدموع أشكال و تبكي التماسيح

گالت لي والله و گلت و إذيا حَلفتي
يحلف حرامي الليل لأجل التباريح

گالت حياتي ليل و إنتَ شمعـتي
گلت و يا بنت الناس أشري مصابيح

گالت إبّحر الشّوگ تاهَـت رحلتي
گلت البحور تخون خير المَلاليح

گالت وشّو هونت ؟ گلت إشّفهَمتي
ماني بغرامِك كِنت ريشة فوَسَط ريح

گالت و جرح الروح ؟ گلت إنجرَحتي ؟
گالت أجل مِنـّك شِفِـت التِجاريح

گلت و أنة شسَوّيَت ؟ إنتِ غِلطتـّي
حَبّيتي بَس الحُب يَبْـغـي تـَصاريح

گالت و فيه غيري ؟ گِلت إنهِـبَلتي ؟
گلبي خزينة شوگ و ماله مفاتيح

گالت إذَن الفراگ ؟ گلت و حِكمِتي
گالت تِظل نـَدمان ... گلت و فلا بيح

گالت إنتَ مَغرور گِلتِـلهة و إنتِ
كَذابة و تـُودّين في شِباكِك نِطيح


ثالثاً / الدارمي :

وهو صِنف من أصناف الشعر الشعبي و قد إشتهر في المحافظات الجنوبية و خاصة محافظة الناصرية و يتكوّن من بيتين فقط . و يُقال إنـّهُ سُمّيَ بـ ( دارمي ) نِسبةً إلى بلاد كانت تـُسَمّى (دار مَي) و نشأ فيها هذا النوع من الشعر و هو يطرح مشاكل أو مواضيع بإسلوب مُكـَثـّف و جميل .
و يأتي الدارمي لعدة أغراض منها :
1- الترحيب بالضيف:


أهلاً و سهلاً بيك و أكثر بـِالوياك
الگلب گبل العين فـَـز و تـِلگاك


2- التحذير لِئلاّ يَحزن الذي يزورهم بفراق العزيز:

بالك تمُر بالدار عَـنهة إشمر بعيد
دار العَـزيز هواي نـَوح و بَچي تريد


فـَيُرَد عليه :

عَمْداً أمر بالدار و النوح أزيده
و أسمَع صَداهة يگول راح التِريده


أو :

عَمداً أمر بالدار و أشبَع مَغـَمّة
و أبْچي بَچي المَفطوم من يذكر اُمّه



3- آخر يشكي حَظـّه المُتعـَثـّر:

الدِنية بَس وياي شدّت عَداوة
ولا واحد من الناس لِجروحي داوَة


فيُؤيدهُ آخر :

الدِنية لِلتِهواه ترگِص إمفـَرعـة
و آنة تِجيني بموس و تگِلـّي إبلعَه


4- آخر يَشكي فـُرقة الأخوان:

يا عازة الخـُوّان عازتهة عازة
و الما وراهة صِياح وَحشة الجـِنازة


و يُرَد عليه :

چا شِلـّي بالخـُوّان و الما ينفعون
عود من أموت إيجون وَيّ اليشَيعون



رابعاً / الأبوذيّة:


هو أحد أنواع الشعر الشعبي و يتكوّن من أربعة أشطر تـُسَمّى البيت . الثلاث الأولى تنتهي بلفظ واحد أو مُتـقارب جدّاً و الشطر الرابع لا بُدّ أن ينتهي بكلمة نهايتها ( يـّة ) و يسَمّى الرباط ولا بُدّ لِلـَفظ المُشترك في الأشطر الثلاث أن يكون في كلّ شطر يعـطي مَعنىً غير الشطرين الآخرين و بذلك يكون لفظ واحد بثلاث معاني.

و أوّل من قال و نظم شعر الأبوذيّة هُم أهالي سوق الشيوخ و لديهم باعٌ طويل في نـَظمِه بالإضافة إلى باقي أنواع الشعر الشعبي. و تـتمَيّز الأبوذيّة أنّها تـُنظـّم في الأحزان و الفـُراق و لِذا أخذ إسمه مِنها ( أبو الأذيـّة ) و شاعت الأبوذيّة بهذه الصيغة نتيجة اللـّهجة العاميّة لِلمَنطقة.


مثال على ذلك :

ياروحي لِليُودّچ حَيَل وِدّيه
إله حِنـّي و چثير الشوگ وَدّيه
عَلي واجب لزوم أگضيه و أدّيه
إلك ياللـّي كِثـَر فـَضلك عَلـيّة

و حَگ آية عَصا موسى و سينا
إلك حَثـّت رجايبنه و سينا
إلك حِسن النبي يوسف و سينا
إلي و النور إلك و النار إلِـيّة

كِل مُغـرَم برَت عِلـّته وناله
سعيد اللي حِضة بشَخصك و ناله
الطارِش من سِمَع نوحي ونى له
تِرَك شِغله و بچة رَحمة عَليّة

بنار الهَجر يا مُهجة دِموعاي
على مصابي السِمَة تمطر دموعاي
شما هَلـّن يادندوشة دموعاي
حَسناتـِچ تِتبَدّل بألف سَيّة

ياروحي بَسّچ من اللـّوم عِنـّي
و طارش لِليوِدّچ دوم عَنـّي
شلون أنشِد على الما نِشَد عَنـّي
أوِنـّن عَاليوِن دايم عَليّـــــة



و الأبوذيّة أنواع :

* المطلق و المولد :


هاتان التسميتان هما لنمط واحد من الشعر و هو النمط التقليدي للأبوذيّة و لكن يكمن الفرق بأن الأبوذيّة المطلق تأتي من فِـكر الشاعر و إحساسِه كما في هذه الأبوذيّة :


تشوف همومي بعيونك و تـَرها
و تغيب و تِگطع بروحي وَترها
يرَهّيك الوكِت ياسْمر وَترها
وتصير إنتَ أبو الرّاهي عَليّة



* أما الأبوذيّة المولد فيكتبها الشاعر مُستعيناً بخيال غيره من شعراء الفـُصحى و ذلك بأن يبدأ الأبوذيّة ببـيـت أو بـيتيـن من الشعـر الفصيح و من ثم يـبني عليهم أبوذيّـته كما في المثال التالي :


يقولون لـَثم الغانيات مُحَرّمٌ و سَفك دَماءِ العاشقين مُباحُ
لا بُدّ من حي الحبيب زيارة ولو رُكّـزت حولَ الخيامِ رماحُ

روحي برَشِف خـَدّك من عداهة
أحب وَصلك و أهابك من عداهة
فراگك يوم أحمله من عداهة
أزورك لو تصير أحزاب إليّـة



* الأبوذيّة المِشط :


هي مجموعة من الأبوذيّات المُتصلة المُترابطة و كل ثلاثة أشطر تليها ثلاثة أشطر أخرى أما الشطر الرابع المُكَمّـل للأبوذيّة فهو يأتي في نهاية المطاف بعد أربع أو خمس أبيات و أكثر كما في هذا المثال :


الدَهر يا صاح بالفـُرگة ولانة
ولا نوبة إنكِسَر گلبي و لانة
لا إنتَ عرَفِت الحُب ولا نة
نِسينا الشوگ و أخلفنا وَعَدنة
وعلى الهِجران رَدّينة و عِدنة
هذا من الوكِت و الحب وَعَدنة
يفـر بـيّـة الوكِت نوبة و أفر بيه
و من ثلج العمر دَربي وَفـَر بيه
أشرد وَيَن أنة بگلبي و أفـُر بيه
بـدَرُب مَسْدود و مَتية مَحَلـّة
دموعي چَم ذنب گلبك محله
بعد طير بضباب أبداً محله
ولا أظن بعد نِتلاگة سُويّـة



* الأبوذيّة المدوّرة :

يُطلق على الأبوذيّة بالمدوّرة عندما يكون المَعني بالشطر الثالث غير واضح و مَبتـور فيُـكمّله البيت الرابع كما في المثال الآتي :


عَگلي يا ترِف حُبّـك و جَن بيك
من الجوري يامَحبوبي وَجَن بيك
إجيت إنتَ على وَعدك و إجَن بيك
ليالي الفـَرَح و أيّـامي زِهِـيّـة



* التطريز بالأبوذيّة :

فن التطريز فن قديم تواجَد في الشعر العربي الكلاسيكي و تواصل إلى الأبوذيّة و يُقصد منه بأن يبدأ جميع الأشطر بأحرف إسم مُعيّن كإسم الحَبيبة أو الصديق أو ما شابَه ذلك كما في هذا المثال المُطـَرّز بإسم زينب :


ز - زهرة بغـصِن عُمري تفوح بـِتـنة
ي – يا صورة على وسادة فـَرَح بـِتنة
ن – نـَغـَم رافـَگ بتوت الگـلب بتنة
ب - بشاير فرَح مِنهة تهـِل عَـليّـة



خامساً / الزهيري :


و هو من أنواع الشعر العراقي الجميلة و فيها يكون الزهيري مُكَـوّن من سَبعة أبيات الثلاثة الأولى تنتهي بكلمة و الثلاثة الثانية تنتهي بكلمة أخرى ... لِـيعود البيت السابع ليُخـتـَم بنفس الكلمة في المَجموعة الأولى بشَرط أن تـتـشابه كـُل مجموعة من الكلمات لفظياَ و تختلف في المعنى .
و هذا البيت من الزهيري مثال على ذلك ( بلهجة أهل الرمادي ) :



بغداد ما تِنحني لا تظن تِذلها الهَمَر
بغداد تـُبقة عـَلم و شكـَم غـزو إلهة مَر
خـَيْرات تِسگي البشر و إللـّي أنسكة إلهة مر
تِسألني ظـَلـّت زِلِـم ؟ إي والله ظـَلـّت أجَـل
تِضرب و يشهَد زُحَـل ما نال مِنهة وِجَـل
سيفك يَخَي جَرْدَه كِـل روح و إلهة أجل
حتـّى الگلب ينمرد لـَمّن يشوف الهَمَر


أو البيت الآخر للشاعر المُمَيّـّز مالك الحزين ( لهجة وسط و شمال غرب العراق) :


ما رحتي هذا الگلب بوصال مَرّة إنتِ
و مَرّنتي گلبي على الهجران مَرّنتيه
رِدنة تـُمِرّين مَرّة بشوگ مَرّة إنتِ
ما رِدنة مِنـّچ ذهب بَس شوف وَجهـِچ بس
و شَحّـيتي بمواصلِـج ليما هِرشنة يبَس
حِلوة و شَبيهة گـُمَر و عيون تِسحَر... بَس
مَرّة إنتِ رُغم الحَلاة البيـچ مُـرّة إنتِ



و تـتفرّع عن الزهيري أنواع أخرى مثل اللغـز و الذي تكون فيه كلمات الزهيري مُشتـقـة من كلمة واحدة

مثل قول الشاعر :

عيونك دِيرتي تِدري و داري
و دِرَت ديرَتنة يا دِرّتي أداري
بيك و ما داري و أداري
دموع العين لو سالت و سالت
سؤال تريد ما تسإل و سالت
سَل عَـنـّي تِسَلـّي روح سَلـّت
سِألتـك بالـذي عالِـم و داري



و كذلك قول آخر لمالك الحزين :


دُور بدينـَك يا غالي الروح في دينك
إنك تِجافي الذي مَديون إله ديَـنك
بالعَجَل جَـتـّي النهاية و تـَونة بادينك
ورَيَت گلبي و لا عالماي تِحضَرني
و طيوفك بشوگ كِل مِشوار تِحضرني
چانت اُمنيتي گبل لا أموت تِحضرني
تِغـَمّض لي عيني يا ساهي العين بإيدينك



سادساً / العتابة :

و هي تشبه الأبوذيّة من ناحية إشتمالها على أربعة أبيات إلا أن البيت الأخير ينتهي بكلمة تنتهي بالمقطع ( اب ) و هذا النوع غالباً ما يزدهِـر في المناطق الوسطى و الشمالية من العراق
و مثال ذلك قول الشاعر (لهجة وسط و شمال غرب العراق _ بادية الجزيرة ) :



ما غاب طـَيف الولِف من يوم وَدّعتو
و گليبي بيدو أمانة وياه وَدّعتو
و نِخيت رَبّ العَـرش يا عالي و دِعيَـتو
تِلهَم رويحي الصَبر و تِـرجّع اللي غاب
هَمّيتو گلبي بعشِگ و بشوگ ما رِحتوه
و إن رحتو عن ناظري عن بالي ما رِحتو
ساري بدروب العشِگ و أدريني ما رَح توه
لاني دِليلي العشگ و الشوگ للأحباب









رد مع اقتباس
قديم 08-11-2011   رقم المشاركة : 2
الذهبي
عضو نشيـط






الذهبي غير متواجد حالياً

الذهبي على طريق التمييز


افتراضي

بارك اللة بيك يا اختي على هذا المجهود الرائع







رد مع اقتباس
قديم 08-12-2011   رقم المشاركة : 3
miss moon

::قمـر المنتدى ::

 
الصورة الرمزية miss moon







miss moon غير متواجد حالياً

miss moon على طريق التمييز


افتراضي

شكرااااااااا وقواك الله







رد مع اقتباس
قديم 08-14-2011   رقم المشاركة : 4







عبيديه وافتخر غير متواجد حالياً

عبيديه وافتخر على طريق التمييز


افتراضي

شكرا الكم اتمنى الاستفاده
من الموضوع







رد مع اقتباس
قديم 08-14-2011   رقم المشاركة : 5
Administrator
المدير
 
الصورة الرمزية Administrator







Administrator غير متواجد حالياً

Administrator على طريق التمييز


افتراضي

بارك الله فيك نورينا مثل هذه المواضيع الجميلة







رد مع اقتباس
قديم 08-21-2011   رقم المشاركة : 6







عبيديه وافتخر غير متواجد حالياً

عبيديه وافتخر على طريق التمييز


افتراضي

انشالله عيوني ادلل
يسلمووووو







رد مع اقتباس
قديم 07-17-2012   رقم المشاركة : 7
حزن الفواطم
جديد على المنتدى






حزن الفواطم غير متواجد حالياً

حزن الفواطم على طريق التمييز


افتراضي

شكرا الف شكر على الموظوع المتميز والمعلومات الجميلة الي تساعدنا على معرفة الشعر اكثر







رد مع اقتباس
قديم 09-14-2012   رقم المشاركة : 8
 
الصورة الرمزية ملكة الليل







ملكة الليل غير متواجد حالياً

ملكة الليل على طريق التمييز


افتراضي

روعة ما قدمتي لنا
زهور الرحمن لقلب الطيوب







رد مع اقتباس
قديم 09-24-2012   رقم المشاركة : 9
علي العاشق
عضو نشيـط






علي العاشق غير متواجد حالياً

علي العاشق على طريق التمييز


افتراضي

جميله اشعاركي موفقه







رد مع اقتباس
قديم 01-27-2013   رقم المشاركة : 10






ناصر الموزاني غير متواجد حالياً

ناصر الموزاني على طريق التمييز


افتراضي

كلمات جميله شكرا للانتقاء الرائع







رد مع اقتباس
إضافة رد

الكلمات الدلالية (Tags)
الشعبي...موسوعه, الشعر, انواع, كامله


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
قوانين قسم الشعر الشعبي للاقسام الادبيه عبيديه وافتخر منتدى الشعر الشعبي 5 08-26-2013 02:24 AM
احمد العجمي - سورة ال عمران كامله MaZyOoOoNa منتدى الصوتيات والمرئيات الاسلامية 3 10-04-2012 04:04 PM
من تراث العراقي رموز الشعر الشعبي ملكة الليل اخبار التقارير والبحوث العلمية 2 10-01-2012 02:40 PM
تحميل لم اكن اعلم - السلسله كامله Administrator اخبار الافلام الاجنبية, تحميل افلام, تحميل ترجمة 1 08-15-2012 06:35 PM
ازياء محجبات كامله مثنى العبيدي منتدى المرأة 3 09-11-2011 03:28 PM

Preview on Feedage: %D8%A7%D8%AE%D8%A8%D8%A7%D8%B1-%D8%A7%D9%84%D8%B9%D8%B1%D8%A7%D9%82 Add to My Yahoo! Add to Google! Add to AOL! Add to MSN
Subscribe in NewsGator Online Add to Netvibes Subscribe in Pakeflakes Subscribe in Bloglines Add to Alesti RSS Reader
Add to Feedage.com Groups Add to Windows Live iPing-it Add to Feedage RSS Alerts Add To Fwicki

الساعة الآن 08:51 AM


Powered by vBulletin™ Version
Copyright © 2014 vBulletin Solutions, Inc. All rights reserved.
Search Engine Optimization by vBSEO ©2011, Crawlability, Inc.

Privacy Policy

إن جميع ما ينشر في موقع اخبار العراق هو منقول ومفهرس من الوكالات والقنوات العلمية والاخبارية وليس بالضرورة يعبر عن رأي صاحب الموقع